You should setup NX Bar properly

ಐಐಎಸ್ಸಿ ವಿಜ್ಞಾನಿಗಳಿಂದ ಬ್ಯಾಕ್ಟೀರಿಯಾಗಳ ವ್ಯೋಮಪಯಣಕ್ಕೆ ಸಾಧನ ಸಿದ್ಧ

 

iisc

ಮುಂದಿನ ಮಂಗಳಯಾನದಲ್ಲಿ ಜೀವಿಗಳನ್ನೂ ಕಳಿಸಲು ವ್ಯವಸ್ಥೆ ರೆಡಿಯಾಗಿದೆ. ಬೆಂಗಳೂರಿನ ಇಂಡಿಯನ್‌ ಇನ್ಸ್‌ಟಿಟ್ಯೂಟ್‌ ಆಫ್‌ ಸೈನ್ಸಸಿನ ಇಂಜಿನೀಯರುಗಳು ವ್ಯೋಮದಲ್ಲಿ ಬ್ಯಾಕ್ಟೀರಿಯಾಗಳಂತಹ ಸೂಕ್ಷ್ಮಜೀವಿಗಳನ್ನು ಬೆಳೆಸಿ, ಅಧ್ಯಯನ ಮಾಡಲು ಅಗತ್ಯವಾದಂತಹ ಪುಟ್ಟ ಲ್ಯಾಬ್-ಆನ್-ಚಿಪ್‌ ಉಪಕರಣವನ್ನು ಸಿದ್ಧಪಡಿಸಿ, ಪರೀಕ್ಷಿಸಿದ್ದಾರೆ. ಇದು ಭೂಮಿಯಲ್ಲಿದ್ದುಕೊಂಢೇ ಲಕ್ಷಾಂತರ ಕಿಲೋಮೀಟರುಗಳು ದೂರದಲ್ಲಿರುವ ವ್ಯೋಮನೌಕೆಯಲ್ಲಿ ಬ್ಯಾಕ್ಟೀರಿಯಾಗಳನ್ನು ಬೆಳೆಸಿ ಅಧ್ಯಯನ ಮಾಡಲು ನೆರವಾಗುತ್ತದೆ.

ಬ್ಯಾಕ್ಟೀರಿಯಾಗಳನ್ನು ಬೆಳೆಸಲು ಸದಾ ಬೆಚ್ಚಗಿರುವ ವಾತಾವರಣ ಬೇಕಾಗುತ್ತದೆ. ಪ್ರಯೋಗಾಲಯಗಳಲ್ಲಿ ಇದಕ್ಕಾಗಿ ವಿದ್ಯುತ್ತಿನಿಂದ ಬೆಚ್ಚಗಿಡಬಹುದಾದ ಸಾಧನಗಳಿರುತ್ತವೆ. ಆದರೆ ವ್ಯೋಮದಲ್ಲಿ ಇಷ್ಟು ದೊಡ್ಡ ಉಪಕರಣವನ್ನು ಕೊಂಡೊಯ್ಯಲಾಗಲಿ, ವಿದ್ಯುತ್ತಾಗಲಿ ಇರುವುದಿಲ್ಲ ಜೊತೆಗೆ ಅಲ್ಲಿನ ಪರಿಸರ ಅತ್ಯಂತ ಶೀತಲವಾ ಕೂಡ. ಹೀಗಾಗಿ, ಪುಟ್ಟದಾದ, ಅಲ್ಪ ವಿದ್ಯುತ್ತಿನಲ್ಲಿಯೇ ಬೆಚ್ಚಗಿನ ವಾತಾವರಣವನ್ನು ನೀಡುವ ಉಪಕರಣಗಳ ಅವಶ್ಯಕತೆ ಇದೆ.

ಐಐಎಸ್ಸಿಯ ಮೆಕ್ಯಾನಿಕಲ್‌ ಇಂಜಿನೀಯರಿಂಗ್‌ ವಿಭಾಗದ ಕೌಶಿಕ್‌ ವಿಶ್ವನಾಥನ್‌ ಹಾಗೂ ಅಲೋಕ್‌ ಕುಮಾರ್‌ ಮತ್ತು ತಂಡದದವರು ತಯಾರಿಸಿರುವ ಈ ಸಾಧನದಲ್ಲಿ ಒಮ್ಮೆಲೇ ಹನ್ನೆರಡು ವಿಭಿನ್ನ ಬ್ಯಾಕ್ಟೀರಿಯಾಗಳನ್ನು ಬೆಳೆಸಬಹುದು. ಒಂದು ವಾಟ್‌ ಅಂದರೆ ಒಂದು ಸ್ಮಾರ್ಟ್‌ ಫೋನ್‌ ಬಳಸುವುದಕ್ಕಿಂತಲೂ ಕಡಿಮೆ ವಿದ್ಯುತ್ತನ್ನು ಇದು ಬಳಸುತ್ತದೆ. ಜೊತೆಗೆ ದೂರದಿಂದಲೇ ಬ್ಯಾಕ್ಟೀರಿಯಾದ ಬೆಳೆವಣಿಗೆ ಹೇಗಾಗುತ್ತಿದೆ ಎಂದು ಕೂಡ ತಿಳೀಯಬಹುದು.

ಪುಟ್ಟ, ಪುಟ್ಟ ಕೆಲವೇ ಮಿಲಿಮೀಟರು ಅಗಲದ ಪ್ಲಾಸ್ಟಿಕ್‌ ಕೋಣೆಗಳಿರುವ ಉಪಕರಣ ಇದು. ಇದರ ತಳದಲ್ಲಿ ಎಲ್‌ಇಡಿ ದೀಪವನ್ನೂ, ಮೇಲ್ಬಾಗದಲ್ಲಿ ಬೆಳಕಿನ ತಗುಲಿದಾಗ ಅದರ ಪ್ರಖರತೆಗೆ ತಕ್ಕಂತೆ ವಿದ್ಯುತ್‌ ಉತ್ಪಾದಿಸಬಲ್ಲ ಫೋಟೋಡಯೋಡ್‌ ಸಂವೇದಕವನ್ನೂ ಜೋಡಿಸಲಾಗಿದೆ. ಇವೆರಡರ ನಡುವೆ ಇರುವ ಕೋಣೆಯಲ್ಲಿ ಬ್ಯಾಕ್ಟೀರಿಯಾಗಳು ಬೆಳೆಯಲು ಬೇಕಾದ ಸಕ್ಕರೆ ದ್ರಾವಣವನ್ನು ಇಡಬಹುದು. ಈ ದ್ರಾವಣಕ್ಕೆ ಬೇಕಾದ ಬ್ಯಾಕ್ಟೀರಿಯಾಗಳನ್ನು ಇಷ್ಟಬಂದಾಗ ಸೇರಿಸುವ ವ್ಯವಸ್ಥೆ ಮಾಡಲಾಗಿದೆ. ಭೂಮಿಯಿಂದಲೇ ಸಂಕೇತವನ್ನು ನೀಡಿ, ಈ ಕೋಣೆಗಳೊಳಗೆ ಬ್ಯಾಕ್ಟೀರಿಯಾವನ್ನು ಹರಿಯಬಿಡಬಹುದು. ಅನಂತರ ಅವು ಬೆಳೆಯುವ ಬಗೆಯನ್ನು ಗುರುತಿಸಬಹುದು.

ಬ್ಯಾಕ್ಟೀರಿಯಾಗಳು ಬೆಳೆದಂತೆ ಎಲ್‌ ಇಡಿ ದೀಪದಿಂದ ಹರಿಯುವ ಬೆಳಕಿನ ಪ್ರಖರತೆ ಕುಂದುತ್ತದೆ. ಇದನ್ನು ವಿಶ್ಲೇಷಿಸುವ ಮೂಲಕ ಅವುಗಳ ಬೆಳೆವಣಿಗೆ ಹೇಗಿದೆ ಎಂದು ಅರ್ಥಮಾಡಿಕೊಳ್ಳಬಹುದು. ಹೀಗೆ ದೂರನಿಯಂತ್ರಣದಿಂದಲೇ ಬೇಕೆಂದ ಬ್ಯಾಕ್ಟೀರಿಯಾವನ್ನು, ಬೇಕೆಂದಾಗ, ಬೇಕಾದ ಪೋಷಕಾಂಶಗಳನ್ನು ನೀಡಿ ಬೆಳೆಸಿ ಪರೀಕ್ಷಿಸುವ ವ್ಯವಸ್ಥೆ ಈ ಸಾಧನದಲ್ಲಿ ಇದೆ.

ಕೋಣೆಗಳಲ್ಲಿಟ್ಟ ಬ್ಯಾಕ್ಟೀರಿಯಾ ಸೋರದಂತೆ ಭದ್ರವಾಗಿಯೂ, ಎಲ್‌ಇಡಿ ದೀಪದ ಪ್ರಖರತೆಯಿಂದಾಗಿ ಹೆಚ್ಚು ಬಿಸಿಯಾಗದಂತೆಯೂ, ಇದರಿಂದಾಗಿ ಬ್ಯಾಕ್ಟೀರಿಯಾಗಳ ಬೆಳೆವಣಿಗೆಗೆ ಅಡ್ಡಿಯಾಗದಂತೆಯೂ ಎಚ್ಚರ ವಹಿಸಲಾಗಿದೆ ಎನ್ನುತ್ತಾರೆ ಕೌಶಿಕ್‌ ವಿಶ್ವನಾಥನ್.‌ ಈ ಸಾಧನದಲ್ಲಿ ಸ್ಪೋರೋಸಾರ್ಸಿನಾ ಪ್ಯಾಶ್ಚುರೈ ಎನ್ನುವ ಬ್ಯಾಕ್ಟೀರಿಯಾವನ್ನು ಬೆಳೆಸಿ ಪರೀಕ್ಷಿಸಿಯೂ ನೋಡಿದ್ದಾರೆ.

ಇನ್ನು ಇದು ವ್ಯೋಮದಲ್ಲಿ ಇರುವ ಒತ್ತಡಗಳ ವ್ಯತ್ಯಾಸ, ವ್ಯೋಮನೌಕೆಯ ಅಲುಗಾಟಗಳನ್ನು ತಾಳಿಕೊಳ್ಳುವಂತೆ ಮಾಡಿದರೆ ಮುಂದಿನ ಗಗನಯಾನವೋ, ಮಂಗಳಯಾನದಲ್ಲಿಯೋ ನಾವೇ ಜೀವಿಗಳ ಪರೀಕ್ಷೆಯನ್ನು ಕೈಗೊಳ್ಳಬಹುದು. ಬೇರೆ ಜಂತುಗಳನ್ನೂ ಬೆಳೆಸುವುದಕ್ಕೆ ಇದು ನೆರವಾಗಬಲ್ಲುದು ಎನ್ನುವ ಆಶಯವನ್ನು ಐಐಎಸ್ಸಿ ವಿಜ್ಞಾನಿಗಳು ಪ್ರಕಟಿಸಿದ್ದಾರೆ.

ಈ ಶೋಧದ ವಿವರಗಳನ್ನು ಆಕ್ಟಾ ಆಸ್ಟ್ರೋನಾಮಿಕಾ ಪತ್ರಿಕೆ ಪ್ರಕಟಿಸಿದೆ.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.

%d bloggers like this: